ريم ابوزيد تكتب ” ألزم الاهتمام او إنصرف “

مشاهدة
أخر تحديث : الإثنين 22 يناير 2018 - 1:33 صباحًا
ريم ابوزيد تكتب ” ألزم الاهتمام او إنصرف “

الاهتمام او الاهمال كلمة رنت في وداني وانا بفكر اكتب ايه واقول ايه وكل الناس بتتكلم وبتقول .. بس وانا قاعده كده بفكر اكتب عن ايه مأثر فيا جدا اليومين دول او اليومين اللي فاتو لقيت ان الاهتمام والاهمال حاجتين مهمين جدا في حياتنا

يعني مثلا ممكن انت روحك تنطفي من اهمال شخص انت بتحبه ليك .. او ان انت تبقى مش فاهم هو عايز ايه .. عايزك تبقى معاه وجمبه ولا عايز يبقى لوحده .. انت مش فاهم الوضع اللي مريحه ايه الاهتمام ولا انك تطنش وتكبر دماغك بالمسميات بتاعتنا واللي هي بتترجم لاهمال

وممكن في ظل كمية الاهمال اللي انت بتكون محاط بيه بتهمل نفسك من شكل وجسد وروح بتنطفي من جواك وبيظهر على ملامحك بيكون في فجوه وتوهان فظيع بيأثر على كل حاجه في حياتك ..

ولما بفكر اكتر بقول يعني ممكن احنا اللي بنحط نفسنا في الدايره دي بسبب ان احنا دايما منتظرين .. وارجع وارد عليا تاني واقول وهي الحياه ايه غير انتظار وامل وحبة حاجات كده فوق بعض .. بس يرجع عقلي اللي ما بيسكتش ده كمان ويصهلل كده في الكلام ويقولي لا يا حلوه انتي اللي بتعملي في نفسك كل ده علشان انتي اللي بتتعشمي في اللي قدامك انه يهتم والناس بتكون مشغوله في حياتها ومش حاطه للاهتمام اي اعتبار .. او ممكن طريقة تانيه ان اللي قدامك طريقة اهتمامة بيك غير الطريقة اللي انت بتفهمها

 بس الخلاصه في الكلام ده ان الاهمال بجد بيأثر علينا بالسلب وممكن بيوصلنا لمرحله بتحس انك ميت اكلينيكيا بسبب الحزن اللي جواك والتفكير في انك فعلا محتاج شخص يهتم بيك بجد الاحساس ده مميت

وعلى النقيض بقى ما نتكلمش عن الجانب المظلم بس ونتكلم بقى عن الجانب المشرق (الاهتمام) ..  وقد ايه لما بيكون في حياتك حد مهتم بيك وبيخاف عليك بيغير نفسيتك 180 درجه بيبدل حالك بيخلي روحك تبقى مليانه طاقه ايجابية ومعنوياتك في السما وقلبك منور وعقلك مبسوط وروحك منتعشه .. قد ايه الاهتمام بينعش روحك وبيغير حياتك وملامحك للافضل قد ايه بيلون عيونك وبيخلي ملامحك اجمل من الطبيعي .. وانت كمان في الوقت ده بتهتم بنفسك وبتكون في احسن اوقاتك .. قد ايه فعلا انك تتمنى حاجه وتحصلك ده بينعش روحك وبيديك امل اكتر وكل ده بينعكس على اللي حواليك كمان مش بيكون الانتعاش ليك انت لوحدك

 

الخلاصة من الكلام ده بجد حاول على قد ما تقدر ما تستسلمش للأهمال او الانتظار ان حد يهتم بيك حب نفسك انت بقدر المستطاع وعلى قد حبك لنفسك هيكون حب الناس ليك بس خلي بالك لان في شعرة بين الانانية وحب النفس الطبيعي “تذكية النفس ” اهتم بنفسك وركز على نقاط قوتك مش مهم ايه مشاكل شخصيتك .. لو مشاكلك مضايقاك هتقدر مع الوقت تظبطها او هتلاقي الاشخاص المناسبين للتعامل معاك .. الدنيا واسعه جدااا .. لكن لما الواحد دماغه بتقفل بجد بيحس ان الدنيا ضاقت بما رحٌبت .. متقفلش دماغك على تفكير او اشخاص محددين افتح قلبك وعقلك على الحياه واغلط واتعلم واعرف ناس واتاكد ان منهم مناسب يكمل معاك ومنهم مش مناسب وخليك متاكد مفيش حاجه بتيجي في طريقك الا وبتعلمك وبتخليك تنضجك وبتحسن تفكيرك .. ولا اغفل عن ذكر ان كل شئ بمقدار فالمزايده في الاهتمام او الاهمال يقتلان فلا تغالي في احدهما .. 

دمتم محبين لأنفسكم 

رابط مختصر Share