ريم ابوزيد تكتب عن “السعـــــــــــادة”

مشاهدة
أخر تحديث : الأحد 7 يناير 2018 - 1:48 صباحًا
ريم ابوزيد تكتب عن “السعـــــــــــادة”

لااا .. لااا تتنهد .. لا لا لا لا تتنهد .. بعد شوية الضحكة تعود .. بدأت الاغنية مع اول  شفطه من قهوتي المميزه في اليوم اللي منوراه الشمس ده

لقتني فجأه بقوله ياااه انت فين من بدري يا عم كاظم .. ده انا اتنهدت تنهيدااات بعمري كله طول السنة اللي فاتت ومع بداية السنة دي .. بس احب اقولك مش هتنهد ولا هزعل تاني ابداا لان بجد الحزن بياخد من الانسان كتير جدااا .. بياخد صحته ولمعة عنيه وبيخطف روحه وبيخلي لونه شاحب .. طبيعي اننا نزعل لان احنا بشر بس اللي مش طبيعي انك تسيب نفسك للحزن

مع بداية يوم جديد والشمس طالعة وبتقولي ابدأي يوم جديد بحياة سعيده وابعدي عن التعاسه قررت اشارككم احساسي بالسعادة انهارده وفكرت في السعادة اللي اكتشفت انها مخاصماني بقالها 4 سنين تقريبا ولما كانت بتزورني كانت بتزورني على شكل اغنية ايهاب توفيق تخاطيف تخاطيف وتجري تبعد عني بسرعه ويرجع وشي شاحب تاني

انهارده مع شمس يوم جديد واشراقة امل جديده ولسه في بداية سنه جديده احب اكون ممتنه لكل حاجه انا بملكها (الحمدلله) واكون ممتنه لكل حواسي اللي ظلمتها السنين اللي فاتو دول قد ايه اجسامنا بتصرخ من الالم من كتر اللي بنعمله فيها ومش بنحس .. كم مره دخلت المستشفى علشان كنت زعلان ؟ الم نفسي مش عضوي .. كم مره اشتكيت من صداع او الم في صدرك او الم في معدتك او انك مش قادر تاخد نفسك ؟ كم مره وكم مره وكم مره ظلمت نفسك ؟

احب اقول لكل حاجه معايا دلوقتي شكرا وقد ايه انا بحبك

احب اقول لكل شخص استحملني في عصبيه وفي هدوء وفي كل حالاتي المختلفه قد ايه انا بحبك

احب اقول لكل انسان كان عايز مصلحة وغار بالسلامه قد ايه برده انا بحبك علشان علمتني كتير

احب اقول لكل انسان قال كلام معملوش واخترع حكايات ما بتحصلش قد ايه انا بحبك لانك عرفتني قد ايه انا بكون قد كلمتي ومش بعرف اخترع حكايات

احب اقول لكل حاجه ربنا مسخرهالي وانا من كتر التعود معنتش حاسه بيها قد ايه انا بحبك

احب اقول لكل اغنيه سمعتها وصفت مشاعري وكل كتاب قريتة وصف حزني وكل فيلم اتفرجت عليه لمس قلبي وكل مسلسل شفته وصف جزء من شخصيتي قد ايه انا بحبكم

واحب اقول لكل انسان بيقرأ الكلام ده قد ايه انا بحبك

افتحوا قلوبكم للسعادة مش للاشخاص .. افتحوا قلوبكم وحبو نفسكم قبل اي كائن حي تاني (بس بدون انانية) علشان في ناس بتأفور .. افتحوا قلوبكم للحياة والفرحة والسعادة وده اسهل بكتير من انكم تقفلوا ابوابها على الحزن والالم والندم .. اتخلصوا من اي انسان ممكن يعكر مزاجكم او يضايقكم .. اتخلصوا من وجعكم ..

اصل السعادة دي اختيار وقرار 

صباحكم او مساءكم سعادة

رابط مختصر Share

اتـرك تـعـلـيـق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة شبكة صدي بورسعيد الإخبارية الالكترونية وهي تلزم بمضمونها كاتبها حصرياً.